夏天狂食冰歎冷氣會令你「感冒」？！

提起感冒, 通常都係諗起凍, 以為翻風凍親先會病…但原來錯啦, 夏天都會有「感冒」架!! Summer同Cold，兩種意思上兩極嘅嘢原來可以同時出現！夏天時有試過覺得疲憊、虛脫、頭暈、冇力、胃口差周身唔自在嗎？症狀同「作感冒」係咪好似呢？夏天先嚟病，冇得出去同陽光沙灘玩遊戲，感覺會更慘呀……

熱感冒(summer cold)成因係乜？
天時暑熱大量出汗，容易導致腦供血不足，腦唔夠血就自然成個人都好似down機冇晒力頭暈暈啦。而當你熱完一輪由30幾度高溫，突然走入個得20幾度嘅冷氣房(有時甚至係只得10幾度嘅雪房大商場)，溫差差成10幾20度，如果再加上你脾胃一向麻麻地身子又差，忽冷忽熱就好易中招作感冒！


夏天唔想病，咁就要由兩方面入手：1)防冷氣、2)健脾胃！

1)        防冷氣
嘆冷氣雖舒服，但佢卻會同時令你易病！所以嘆嘅同時都要防！
點防？又唔係叫你完全唔用冷氣既～只係用嘅時候千祈唔好對正風口位坐/瞓，否則冷氣直吹會令你肌肉同血管收縮，氣血經絡就好易唔通，隨時引發肩頸痛、頭痛等症狀！

所以屋企冷氣最好就用恒溫裝置，而經常要出入冷氣地方，就最好隨身帶多條圍巾或者薄外套。遮住頸肩位置，可防寒邪經頸後入督脈，而出現嘅痛症或感冒。同時記住採用「慢慢穿、慢慢脫」原則，令身體逐步適應溫差改變，將冷氣對你嘅傷害減至最低。

2)        健脾胃
而脾胃同感冒有乜關係？咁就要由中醫角度講起喇～
體質如何，除咗靠先天因素外，就靠你後天點樣調理自己嘅脾胃。一個人脾胃好，自然食得多食得好，氣血強壯；但脾胃唔好嘅人，食得少亦難消化吸收，多數都較為瘦弱，亦即為氣虛體質，免疫力差啲易病啲，呢類人自然特別容易患感冒。

而脾胃最怕嘅就係──寒涼！
喺夏天沖冷水澡，飲冰水雖然令你感覺超爽！但係你嘅脾胃就唔係咁睇啦！脾胃係相當怕凍架，你愈食得多冰，脾胃就愈傷，加上同時會增加你體內嘅濕氣，於是乎會令你夏天出現易累、昏沈、冇胃口等冷氣病症狀。

因此，補水要飲溫開水，沖涼要沖溫水澡，咁先係最佳的養生消暑辦法。


炎夏進補原則：
1)        清涼解暑
食清涼、以及清心火食物，如：西瓜、 青瓜、冬瓜、絲瓜、苦瓜、茄子、番茄、黃花菜、綠豆、花旗參……等等。

2)        以苦為補
以中藥性味功能來說，凡苦味者，都有清心火或通下的作用。所以夏天多食苦味食物可以幫你瀉火清暑、平息心火呢！

3)        健脾化濕
飲冰品、吃生冷食物，以至黃梅天，都會增加人體濕氣，令人食慾不振。多食健脾食物就可化濕，如：鰂魚、黃鱔、雲苓、白朮、咖哩等。

↓以下7款食療茶飲及湯水，大家不妨在夏天飲用，比起飲冰水飲可樂更有益

1.薄荷消暑茶：
材料：新鮮薄荷3-5葉，綠茶茶包一包，冰糖少許
做法：使用150cc的熱開水，放入綠茶至茶色展開，再放入薄荷葉燜3分鐘，待有薄荷香味，濾出茶液，加入適量冰糖調味，放涼飲用。

注意事項：薄荷及綠茶皆能疏散風熱。腸胃不佳者，或是對薄荷過敏者不適合飲用。有失眠問題者不適合夜晚飲用。


2.菊花茅根飲：
材料：白茅根12克，菊花12克，薄荷3克
做法：將白茅根、菊花加水煎煮，滾後加入薄荷燜3分鐘，去渣放涼飲用。
適合咽喉微痛、頭痛、眼睛不舒服的症狀。


3.咸菜苦瓜排骨湯：
材料：咸酸菜5錢，苦瓜１個，黃豆2兩，黑楜椒30~60粒，排骨半斤，鹽少許 （或不用排骨，可用豬肚）
做法：
先將苦瓜洗淨，切片，出水；咸酸菜浸洗乾淨，切粗絲；
黃豆浸洗乾淨；排骨洗淨，飛水；
先將黃豆、排骨、黑楜椒放入煲內，加入清水8碗，煲滾，用文火煲2小時，再加入涼瓜、咸酸菜煲15~20分鐘，調味飲用。


4.節瓜薏米黃鱔湯：
材料：節瓜2個、生薏米2兩、茨實1兩、冬菇2隻、黃鱔1條、瘦肉4兩、生姜4片、鹽少許。
做法：
先將黃鱔剝淨，用鹽搓擦，用清水沖淨，和入滾水中稍煮，撈起過浸冷水，備用；
節瓜刮皮留青，洗淨，切成大塊，備用；瘦肉洗淨切塊，飛水，備用；其餘材料浸洗乾淨。
將所有材料放入瓦煲裡，加清水適量，先用猛火煮沸，再改用文火煲1~2小時，加鹽調味佐膳。

功效：清熱袪濕、緩和拘攣。


5.眉豆小豆鰂魚湯：
材料：眉豆1兩，赤小豆1兩，生薏米1兩，紅棗4粒，陳皮１角，鰂魚１條，生姜2片，紹興酒少許，鹽少許

做法：
將鰂魚洗淨，用油鑊煎香，並攢入紹興酒，迫出白汁，放入煲內；
其餘材料浸透洗淨後，放入煲內，加入清水10碗，煲滾後改用文火煲2小時，加鹽調味，即可飲用。

功效：健脾調中，利水消腫的作用，可以通暢小便，消除疲勞，健脾開胃，補益身體。


6.絲瓜韭菜滾肉片湯：
材料：絲瓜1~2條，韭菜2兩，豬肉4兩，鹽少許，油少許

做法：
將絲瓜洗淨，刮去皮，切段；
豬肉洗淨，切片，用生粉、油、鹽醃好，備用；
肉片放入煲內，加入清水4~5碗，煲滾後，放入絲瓜，滾熟，調味，飲用。

功效：解暑除煩，生津止渴。


7.冬荷綠豆田雞湯：
材料：冬瓜1斤（連皮連核），鮮荷葉1塊，綠豆3兩，田雞8兩，瘦肉4兩，紅棗2粒，鹽適量

做法：
冬瓜用刷擦乾淨冬瓜皮，切塊留核，備用；
田雞去皮去頭、爪，備用；瘦肉洗淨飛 水，備用；
揀選新鮮荷葉，用清水洗乾淨，取一角，備用(後下)；
綠豆用清水浸透洗淨，備用；
將上述備用材料，放入瓦煲內，加入適量清水，煲滾後改用文火煲2小時，再放入新鮮荷葉，稍滾，以少許鹽調味，即可飲用。

功效：清熱消暑、利尿袪濕。預防感暑、中暑。本湯可常飲用。

好內容,老衲來為這篇文章喊聲讚讚讚

讚讚讚讚讚讚讚讚讚讚讚讚讚讚讚讚讚讚